Beşiktaş Mahkemesi 2 Numaralı Sicil (H. 966-968 / M. 1558-1561) cilt: 42, sayfa: 145 Hüküm no: 240 Orijinal metin no: [29b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mihal v. Kosta’nın Şucâ Bey Vakfı’ndan aldığı borç karşılığında Maçka köyündeki evini rehin verdiği Yevmü’l-Cum‘a, fî 28 Kaziyye-i Vakf-ı Şucâ‘ Bey Vech-i tahrîr-i sicil oldur ki Maçuka der-kurb-i Beşiktaş min havâss-ı Kostantınıyye el-mahmiyye nâm karyeden Mihal v. Kosta nâm Nasrânî mahfil-i şer‘a gelip merkūm Şucâ‘ Bey Evkāfı’na hâliyâ mütevellî olan Halebî İbrahim Çelebi mahzarında ikrâr ve i‘tirâf-ı mer‘î kılıp işbu bâ‘isü’l-hurûf İbrahim Çelebi elinden mâl-ı vakıfdan üç bin nakd-i râyic fi’l-vakt fıddî akçe alıp kabz etdikden sonra karye-i mezbûrede vâki‘ olan bir tarafı Yeniçeri Hüseyin b. Abdullah ve bir tarafı Kiryaki v. Kevin ve bir tarafı tarîk-i âm ve bir tarafı yine benim mülküm ile mahdûd olan fevkānî ve tahtânî dörder ocaklı ve bir su kuyusu ile ve bahçesiyle ve cemî‘-i tevâbi‘ ve’l-levâhık ile mezbûr evimi verip rehin kodum ve karye-i mezbûreden Kiryaki v. Kevin nâm nasrânî meblağ-ı merkūmun derkine kefîl verdim deyicek ve üç yüz akçe dahi çuka bahâsından uhdemdedir deyicek mukırr-ı mezbûrun ikrârı ve kavl-i meşrûhunu mezbûr mütevellî İbrahim Çelebi ve kefîl-i mezbûr Kiryaki nâm kimesneler vicâhen kabûl ve tasdîk edip mâ vaka‘a bi’t-taleb kayd olundu. Tahrîren fî gurreti Cemâziyelâhir sene 967. Şuhûd: İsmail Çelebi b. Hayreddin, Hüseyin b. Hızır sipâhî, Hasan b. Abdullah, Ramazan Beşe b. Menteş, Pervâne b. Abdullah, Pîrî Çelebi b. Ahmed, Mehmed b. Mustafa el-muhzır, Ramazan b. Mahmud ve gayruhüm mine’l-hâzırîn.