|
Anadolu Sadâreti Mahkemesi 2 Numaralı Sicil (H. 1251-1257/ M. 1835-1841) cilt: 94, sayfa: 104 Hüküm no: 75 Orijinal metin no: [14a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.
Şerbethaneci Petro’nun Arabacı Hasan Ağa’dan borç alması
Mahrûse-i Galata’da Beyoğlu nâm mahâlde Hüseyin Ağa mahallesinde mütemekkin Şerbethâneci Petro v. Andon zimmî meclis-i şer‘-i şerîf-i enverde müteveffâ Tatar Mehmed İzzet Ağa li-ebeveyn kız karındaşı oğlu Arabacı Hasan Ağa b. Mehmed Tahir mahzarında ikrâr ve takrîr-i kelâm edip mahalle-i mezbûrede vâki‘ Sarı Matatya koltuğu ta‘bîr olunur bir bâb şerbethâne derûnunda mevcûde beyne’l-esnâf gedik ta‘bîr olunur <> âlât-ı lâzıme-i ma‘lûmenin yüz yirmi sehm i‘tibârıyla yedimde malım ve mülküm olan altmış sehm iki pul hisse-i şâyi‘asını mezbûr Hasan Ağa’nın malından zikri âtî istidâne ve kabz edeceğim meblağ mukābelesinde rehin vaz‘ ve mezbûr Hasan Ağa’ya teslîm eylediğimde ol dahi yedimden ber-vech-i muharrer irtihân ve kabz ve kabûl etdikden sonra mezbûr Hasan Ağa malından bana on üç bin iki yüz guruş idâne ve teslîm eylediğinde ben dahi yedinden istidâne ve kabz edip meblağ-ı mezbûr ile semeni işbu târîh-i vesîkadan iki sene tamâmına değin müeccel ve mev‘ûd yine mezbûr Hasan Ağa’nın malından ve yedinden iştirâ ve kabz eylediğim bir hilâlî sâ‘at semeninden dahi üç bin dokuz yüz altmış guruş ki cem‘an on yedi bin yüz altmış guruş zimmetinde mezbûr Hasan Ağa’ya vâcibü’l-edâ deynim olup zikr olunan altmış sehm iki pul âlât-ı muharrere-i mezkûreyi mezbûr Hasan Ağa yine bana îdâ‘ ve teslîm, ben dahi yedinden istîd‘â ve kabz etmemle ol vechile âlât-ı muharrere-i mezkûre hâlâ rehin olmak üzere yedimde alâ-tarîkı’l-emâne mahfûzdur dedikde gıbbe’t-tasdîk Ustabaşı Sarrâfoğlu İstefan v. Tatos ve Ustabaşı Rokos v. Vartan ve mahalle-i mezbûrede mütemekkinler şerbethâneci Aci Marko v. Nikola ve şerbethâneci Aleksan v. Manuk ve Şerbethâneci Petro v. Andon ve Şerbethâneci Kirkor v. Haçadur ve mahrûse-i mezbûrede Kamer Hatun mahallesinde mütemekkin Şerbethâneci Abram v. Minas zimmîler meclis-i şer‘-i şerîf-i enverde mezbûr Hasan Ağa mahzarında ikrâr ve takrîr-i kelâm edip mukırr-ı mersûm Petro zimmînin zimmetinde mezbûr Hasan Ağa’ya edâsı vâcib deyni olan meblağ-ı mecmû‘-ı mezkûr on yedi bin yüz altmış guruşa tarafeynden bi’l-emr ve’l-kabûl kefâlet-i mutlaka-i sahîha-i şer‘iyye ile her birimiz müte‘âkiben kefîl bi’l-mâl ve zâminiz dediklerinde gıbbe’t-tasdîki’ş-şer‘î mâ-vaka‘a bi’t-taleb ketb olundu.
Fî 20 Ra sene [1]256.
Şuhûdü’l-hâl. Çukadâr Salim Ağa, Tahtacı Mehmed Salih Ağa, Şakir Molla, Mektûbî Mehmed Raif Efendi.
|