.:: İstanbul Kadı Sicilleri ::.


Anadolu Sadâreti Mahkemesi 2 Numaralı Sicil (H. 1251-1257/ M. 1835-1841)
cilt: 94, sayfa: 105
Hüküm no: 76
Orijinal metin no: [14b-1]
Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.


Şerbethaneci Aci Marko’nun Ayşe bt. Mehmed’den borç alması

Mahrûse-i Galata’da Beyoğlu nâm mahâlde Hüseyin Ağa mahallesinde mütemekkin Şerbethâneci Aci Marko v. Nikola zimmî meclis-i şer‘-i şerîf-i enverde müteveffâ Tatar Mehmed İzzet Ağa zevcesi Âişe Hatun bt. Mehmed tarafından vekîl-i müsecceli Ahmed Ağa b. Osman mahzarında ikrâr ve takrîr-i kelâm edip mahalle-i mezbûrede vâki‘ Anaştaş Şerbethânesi demekle arîf bir bâb Şerbethâne derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmenin yüz yirmi sehm i‘tibârıyla yedimde malım ve mülküm olan altmış sehm hisse-i şâyi‘asını müvekkil-i mezbûrenin malından zikri âtî istidâne ve kabz edeceğim meblağ mukābelesinde rehin vaz‘ ve vekîl-i mezbûra teslîm eylediğimde ol dahi yedimden ber-vech-i muharrer irtihân ve kabûl etdikden sonra müvekkilesi mezbûre Âişe Hatun’un malından bana on beş bin dört yüz altmış iki buçuk guruş idâne ve teslîm eylediğinde, ben dahi yedinden istidâne ve kabz edip meblağ-ı mezbûr ile semeni işbu târîh-i vesîkadan iki sene tamâmına değin müeccel ve mev‘ûduna müvekkil-i mezbûrenin malından vekîl-i mezbûr yedinden iştirâ ve kabz eylediğim bir hilâlî sâ‘at semeninden dahi dört bin altı yüz otuz sekiz buçuk guruş on para ki cem‘an yirmi bin yüz bir guruş on para zimmetimde müvekkil-i mezbûre Âişe Hatun’a vâcibü’l-edâ deynim olup zikr olunan altmış sehm âlât-ı muharrere-i mezkûreyi vekîl-i mezbûr yine bana îdâ‘ ve teslîm, ben dahi yedinden istîd‘â ve kabz etmemle ol vechile âlât-ı muharrere-i mezkûre hâlâ rehin olmak üzere yedimde alâ-tarîkı’l-emâne mahfûzdur dedikde gıbbe’t-tasdîk Ustabaşı Sarrâfoğlu İstefan v. Tatos ve Ustabaşı Rokos v. Vartan ve mahalle-i mezbûrede mütemekkinler şerbethâneci Aleksan v. Manuk ve Şerbethâneci Petro v. Andon ve Şerbethâneci Kirkor v. Haçadur ve mahrûse-i mezbûrede Kamer Hatun mahallesinde mütemekkin Şerbethâneci Abram v. Minas zimmîler meclis-i şer‘-i şerîf-i enverde vekîl-i mezbûr Ahmed Ağa mahzarında ikrâr ve takrîr-i kelâm edip mukırr-ı mersûm Aci Marko zimmînin zimmetinde müvekkile-i mezbûre Âişe Hatun’a edâsı vâcib deyni olan meblağ-ı mecmû‘-ı mezkûr yirmi bin yüz bir guruş on paraya tarafeynden bi’l-emr ve’l-kabûl kefâlet-i mutlaka-i sahîha-i şer‘iyye ile her birimiz müte‘âkiben kefîl bi’l-mâl ve zâminiz dediklerinde gıbbe’t-tasdîki’ş-şer‘î mâ-vaka‘a bi’t-taleb ketb olundu.

Fî 22 Ra sene [1]256.

Şuhûdü’l-hâl: Eş-şâhidûnü’s-sâbıkūn.