.:: İstanbul Kadı Sicilleri ::.


Anadolu Sadâreti Mahkemesi 2 Numaralı Sicil (H. 1251-1257/ M. 1835-1841)
cilt: 94, sayfa: 105
Hüküm no: 77
Orijinal metin no: [14b-2]
Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.


Hasan Ağa’nın Tatar Mehmed İzzet Ağa’dan intikal eden mirastan hissesini Ayşe Hatun’dan tahsil etmesi

Mahrûse-i Galata’da Beyoğlu nâm mahâlde Hüseyin Ağa mahallesi ahâlîsinden olup mahrûse-i Bursa’da Arab Câmi‘-i şerîfi mahallesinde müsâfiren sâkin iken bundan akdem vefât eden Tatar Mehmed İzzet Ağa b. Hasan’ın verâseti zevce-i menkûha-i metrûkesi Âişe Hatun bt. Mehmed ile li-ebeveyn kız karındaşı oğlu Hasan Ağa b. Mehmed Tahir’e ba‘de’l-inhisâr, mezbûr Hasan Ağa meclis-i şer‘-i şerîf-i enverde tereke-i müteveffâ-yı mezbûre bi’l-verâse vâzı‘atü’l-yed olan işbu bâ‘isü’l-kitâb zevce-i mezbûre Âişe Hatun tarafından vekîl-i müsecceli Ahmed Ağa b. Osman mahzarında bi’l-verâse ikrâr ve takrîr-i kelâm edip mûrisim müteveffâ-yı mezbûrun bi’l-cümle terekesi tahrîr ve ba‘de ihrâci’l-masârıf ber-mûceb-i zeyl-i defter nâib-i Bursa hisse-i irsiyeme isâbet eden otuz bir bin sekiz yüz doksan bir buçuk guruş ve sâlifü’z-zikr Hüseyin Ağa mahallesinde menzilinde mevcûde terekesinden ber-mûceb-i defter-i kassâm-ı askerî hissem olan beş bin üç yüz yetmiş buçuk guruş otuz akçe ki cem‘an otuz yedi bin iki yüz altmış iki guruş otuz akçeyi vekîl-i mezbûr Ahmed Ağa bana tamâmen ve kâmilen def‘ ü teslîm eylediğinde ben dahi yedinden bi’l-verâse bi’t-tamâm ve’l-kemâl ahz u kabz, mûrisim müteveffâ-yı mezbûrun dâhil-i deftereyn-i merkūmeteyn ve hâric-ez deftereyn kalîl ü kesîr [ve] celîl ü hakīr bi’l-cümle ismi mâl ıtlâk olunur tereke-i ma‘lûme ve mechûlesine ve cemî‘ hukūk-ı mîrâsa müte‘allika âmme-i de‘âvî ve mutâlebât ve kâffe-i eymân ve muhâsamâtdan zevce-i müvekkile-i mezbûre Âişe Hatun ile vekîl-i mezbûr Ahmed Ağa’nın zimmetlerini ibrâ-i âmm-ı sahîh-i şer‘î ile bi’l-verâse ibrâ ve iskāt eylediğimde vekîl-i mezbûr Ahmed Ağa dahi husûs-ı mezkûra müte‘allika kezâlik âmme-i da‘vâdan benim zimmetimi müvekkilesi zevce-i mezbûreye izâfetle bi’l-vekâle ibrâ ve iskāt ve her birimiz ber-vech-i muharrer âharın ibrâsını kabûl eyledik dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu.

Fî 2 R sene [1]256.

Şuhûdü’l-hâl: Eş-şâhidûnü’s-sâbıkūn.