.:: İstanbul Kadı Sicilleri ::.


Anadolu Sadâreti Mahkemesi 2 Numaralı Sicil (H. 1251-1257/ M. 1835-1841)
cilt: 94, sayfa: 106
Hüküm no: 78
Orijinal metin no: [14b-3]
Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.


İstemat bt. Hıristo’nun Fermeneci Nikola ile değirmen hissesi hususunda anlaşması

Ma‘rûz,

Rumeli’de Avlonya sancağında Delvine kazâsına tâbi‘ Kardifak karyesinde mütemekkine İstemat bt. Hıristo v. Dimo Nasrâniyenin zevci ve tarafından husûs-ı âti’l-beyânda bâ-hüccet-i şer‘iyye vekîl-i müsbet-i şer‘îsi değirmen işçilerinden arzuhâl eden Vasil v. Ziso nâm zimmî bi’t-terâzî Bâb-ı hazret-i fetvâ-penâhîde Sadâret-i Anadolu mutasarrıfları dâ‘îlerine tahsîs buyurulan dâirede ma‘kūd meclis-i şer‘-i hatîrde müvekkile-i mersûmenin li-ebeveyn ammi Fermeneci Nikola veledeyi’l-mersûm Dimo nâm zimmî muvâcehesinde uncu esnâfının kethüdâsı Edhem Efendi b. Derviş Mehmed ve Yiğitbaşısı es-Seyyid İsmail Efendi b. es-Seyyid Mehmed Emin nâm kimesneler ile esnâf-ı merkūmeden derûn-ı arzuhâlde isimleri mastûr Margos v. Mikail ve Hıristo v. Vasil [15a] nâm zimmîler hâzır oldukları hâlde Üsküdar’da Uncular sokağında Vâlide-yi atîk imâretine merbût Yani Değirmeni ta‘bîr olunur beş horoslu yirmi re’s bârgirli bir bâb uncu değirmeni derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmenin iki re’s bârgir ve ona isâbet eden sâir âlât-ı lâzıme-i ma‘lûme hissesi zevcem müvekkilem mesfûrenin ve on sekiz re’s bârgir ve ona iktizâ eden sâir âlât-ı lâzıme-i ma‘lûme hissesi hâzırân-ı mesfûrân ile sâir ma‘lûmü’l-esâmî kimesnelerin bâ-hüccet-i şer‘iyye iştirâken yedlerinde mülkleri iken zevcem müvekkilem mersûmenin ber-vech-i muharrer mâlike olduğu hisse-i mezkûresini mersûm Nikola zimmî ve hâzırân-ı mersûmân Margos ve Hıristo zimmîlerden her biri bi-gayr-ı hakkın fuzûlî zabt ve vaz‘-ı yed etmeleriyle suâl olunup hisse-i mezkûreden keff-i yed birle zevcem müvekkilem mesfûre için bana teslîme mersûm Nikola zimmî ile hâzırân-ı mersûmândan her birine tenbîh olunmak bi’l-vekâle matlûbumdur deyü da‘vâ eylediğimde mersûm Nikola zimmî dahi cevâbında âlât-ı lâzıme-i mezkûrenin ber-i‘tibâr-ı merkūm iki re’s bârgir ve ona isâbet eden sâir âlât-ı lâzıme-i ma‘lûme hissesini benim bâ-hüccet-i şer‘iyye irsen ve şirâen yedimde emvâlim olmağla bi-hakkın zabt ve vaz‘-ı yed ederim deyü hâzırân-ı mezbûrânın tasdîkiyle benim ber-vech-i muharrer müdde‘âmı külliyen inkâr ve ol vechile beynimizde münâza‘ât-ı kesîre cereyân etmiş idi. El-hâletü hâzihî mersûm Nikola zimmî zevcem müvekkilem mersûme için bi-tarîkı’s-sulh bana malından işbu meclis-i şer‘de yedi yüz elli guruş def‘ ü teslîm eylediğinde ben dahi yedinden bi’l-vekâle ahz u kabz etmemle bi’l-cümle husûs-ı mezkûre ve işbu târîh-i i‘lâma gelince sâir cemî‘ hukūk-ı şer‘iyyeye müte‘allika âmme-i de‘âvî ve kâffe-i mütâlebâtdan ben bi’l-asâle ve müvekkilem zevce-i mersûmeye izâfetle bi’l-vekâle mersûm Nikola zimmî ile hâzırân-ı mersûmân Margos ve Hıristo zimmîlerin zimmetlerini onlar dahi kezâlik bi’l-cümle husûs-ı mezkûre ve işbu târîhe gelince sâir cemî‘ hukūk-ı şer‘iyyeye müte‘allike âmme-i de‘âvîden benimle zevcem müvekkilem mesfûrenin zimmetlerimizi bi’l-asâle her birimiz ibrâ-i âmm-ı sahîh-i şer‘î ile ibrâ ve iskāt ve her birimiz ber-minvâl-i muharrer âharın asâleten ve vekâleten ibrâsını kabûl eyledik deyü ikrâr ve tasâdıklerı tescîl ve huzûr-ı âlîlerine i‘lâm olundu.

Fî 20 S sene [1]256.