.:: İstanbul Kadı Sicilleri ::.


Anadolu Sadâreti Mahkemesi 2 Numaralı Sicil (H. 1251-1257/ M. 1835-1841)
cilt: 94, sayfa: 107
Hüküm no: 79
Orijinal metin no: [15a-1]
Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.


Hatice Hatun’un boşandığı eşinden küçük oğlu için nafaka tahsisi

Medîne-i Üsküdar’da Tavâşî Hasan Ağa mahallesinde sâkine ve zâtı ta‘rîf-i şer‘î ile mu‘arrefe olan işbu bâ‘isetü’l-vesîka Hatice Hatun bt. Mustafa Bâb-ı fetvâ-penâhîde Anadolu Kādıaskeri Efendi hazretlerine mahsûs dâirede akdolunan meclis-i şer‘-i münîrde zevc-i sâbıkı Yogurtçu es-Seyyid Osman b. es-Seyyid Ebubekir mahzarında bast-ı kelâm ve ta‘bîr ani’l-merâm edip mezbûr es-Seyyid Osman ile mukaddemâ zevciyyet beynimizde kāime [iken] mezbûrun firâşından hâsıl ve benden mütevellid ve bi-hakkı’l-hıdâne hâlâ hacr ve terbiyemde olan takrîben altı aylık işbu hâzır bi’l-meclis Mehmed nâm sagīr nafaka ve kisve-bahâya eşedd-i ihtiyâc ile muhtâc olmağla babası mezbûr es-Seyyid Osman üzerine kıbel-i şer‘den vakt [ü] hâle göre tarafeynin hâline nazaran kadr-ı ma‘rûf meblağ farz ve takdîr olunmak bi’l-hıdâne matlûbumdur dedikde gıbbe’t-tasdîki’ş-şer‘î hâkim-i hâsim-i ve’l-icnâb -vaffakallâhu te‘âlâ bi’s-sıdk ve’s-savâb tûbâ lehû ve hüsnü-meâb- efendi hazretleri dahi sagīr-i mezbûrun nafaka ve kisve ve sâir levâzım-ı zarûriyesi için babası mezbûr es-Seyyid Osman üzerine işbu târîh-i kitâbdan beher şehr otuzar guruş farz ve takdîr buyurup meblağ-ı mefrûz-ı mezkûr beher şehr otuz guruşu sagīr-i mezbûrun nafaka ve kisve ve sâir levâzım-ı zarûriyesine harc ü sarfa ve lede’l-hâce istidâneye ve inde’z-zafer babası mezbûr es-Seyyid Osman üzerine rücû‘a mezbûre Hadice Hatun’a izin vermeğin mâ-vaka‘a bi’t-taleb ketb olundu.

Fî 20 R sene [1]256.

Şuhûdü’l-hâl: Muhzırbaşı Mehmed Ağa, Ahmed Ağa, Halil Efendi, Mehmed Ağa.