.:: İstanbul Kadı Sicilleri ::.


Anadolu Sadâreti Mahkemesi 2 Numaralı Sicil (H. 1251-1257/ M. 1835-1841)
cilt: 94, sayfa: 108
Hüküm no: 80
Orijinal metin no: [15a-2]
Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.


Hafize bt. Mustafa’nın üvey kızı Emine aleyhindeki menzil davası

Ma‘rûz,

Sâhibe-i arzuhâl Hafize bt. Mustafa b. Abdullah nâm hatunun sadriye kızı ve tarafından husûs-ı âti’l-beyânda vekîl-i müsbet-i şer‘îsi zâtı mu‘arrefe Âişe bt. Mehmed Ârif nâm hatun bi’l-ma‘iyye rü’yete memûr evkāf müfettişi mevâlî-i i‘zâmdan fazîletlü es-Seyyid Mehmed Emin Âsaf Beyefendi hâzır olduğu hâlde Salı günü huzûr-ı hazret-i fetvâ-penâhîde ma‘kūd meclis-i şer‘-i münîrde müvekkile-i mezbûrenin üveyi kızı olup derûn-ı arzuhâlde mezkûretü’l-ism zâtı mu‘arrefe Emine bt. el-müteveffâ Arabacı İbrahim nâm hatun muvâcehesinde Hazîne-i celîle-i evkāfa mülhak evkāfdan merhûm Mehterbaşı Ahmed Ağa Vakfı’nın mütevellîsi es-Seyyid Nuri Efendi b. Osman hâzır olduğu hâlde üvey pederim müteveffâ-yı mezbûr Arabacı İbrahim b. Mustafa nâm kimesne vakf-ı mezkûr musakkafâtından medîne-i Üsküdar’da Aşçıbaşı mahallesinde vâki‘ hayatında bâ-temessük-i mütevellî bi’l-icâreteyn müstakıllen mutasarrıf olduğu ma‘lûmü’l-hudûd ve’l-müştemilât bir bâb menzilin nısf hisse-i şâyi‘asını hayatında vâlidem mezbûre ile zevciyyet beynlerinde kāime iken iki yüz otuz üç senesi Saferi’l-hayrı’nın dokuzuncu günü zevcesi vâlidem müvekkilem mezbûreye bedel-i ma‘lûm mukābelesinde bâ-re’y-i mütevellî kat‘iyyen ferâğ ve tefvîz eylediğinde ol dahi tefevvüz ve kabûl ve ol vechile nısf menzil-i mezkûr bi’l-icâreteyn tasarrufunda olup lâkin üvey pederim müteveffâ-yı mezbûr Arabacı İbrahim vâlidem müvekkilem merkūmeyi işbu târîhden yirmi üç sene mukaddem tatlîk eyledikden sonra üvey pederim müteveffâ-yı mezbûr menzil-i mezbûrun mecmû‘unu hayatında [15b] târîh-i merkūmdan vefâtı târîhine gelince vâlidem müvekkilem mezbûrenin muvâcehesinde yirmi iki sene müddet bilâ-nizâ‘ zabt ve tasarruf ederek ikisi bir beldede mütevâliyeten sâkinler olup vâlidem müvekkilem mezbûre nısf menzil-i mezkûru müddet-i merkūmede da‘vâ mümkün iken bilâ-özr terk-i da‘vâ ve sükût etmiş idi. Ancak üvey pederim merkūm Arabacı İbrahim işbu târîhden bir sene mukaddem fevt oldukda vâlidem müvekkilem mezbûrenin yedinde olan temessük zâyi‘ olduğundan mâ‘adâ üvey pederim müteveffâ-yı merkūmun nısf hisse-i mezkûreyi vâlidem müvekkilem mezbûreye ber-minvâl-i muharrer ferâğının kaydı dahi defter-i vakf-ı mezkûrda mastûr olmadığına binâen menzil-i mezkûrun mecmû‘unu kızı mezbûre Emine Hatun babası müteveffâ-yı merkūmun âdiyen intikālinden olmak üzere tasarruf eder. Suâl olunup nısf hisse-i mezkûreden keff-i yed birle vâlidem müvekkilem mezbûreye teslîme merkūme Emine Hatun’a tenbîh olunmak bi’l-vekâle matlûbumdur [deyü] eylediği da‘vâsını mezbûre Emine Hatun münkir olmağla bu sûretde müdde‘iyye-i vekîl-i mezbûre Âişe Hatun’a takrîr-i meşrûhu üzere yirmi iki sene müddet bilâ-özr-i terk-i da‘vâ eylediğini mukırra ve mu‘terife iken sinîn-i mezbûreden mukaddem nısf menzil-i mezkûr icâreteyn ile vâlidesi müvekkil-i mezbûrenin tasarrufunda idi deyü da‘vâsı ber-mûceb-i fetvâ-yı şerîfe bilâ-emr-i âlî mesmû‘a olmadığı vekîl-i merkūme Âişe Hatun’a ba‘de’t-tefhîm menzil-i mezbûrun mecmû‘u müteveffâ-yı mezbûre Arabacı İbrahim’in intikālinden kızı mezbûre Emine Hatun’un zabt ve tasarrufu iktizâ eylediği huzûr-ı âlîlerine i‘lâm olundu.

Fî 3 Ra sene [1]256.