|
Anadolu Sadâreti Mahkemesi 2 Numaralı Sicil (H. 1251-1257/ M. 1835-1841) cilt: 94, sayfa: 111 Hüküm no: 82 Orijinal metin no: [16a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.
Mehmed Salih’in, Dimitri ve Yorgi’den alacağı olduğu
Ma‘rûz,
Sâhib-i arzuhâl teba‘adan Mehmed Salih b. Ali nâm kimesne Bâb-ı hazret-i fetvâ-penâhîde Sadâret-i Anadolu mutasarrıfları dâ‘îlerine tahsîs buyurulan dâirede ma‘kūd meclis-i şer‘-i münîrde bakkāl esnâfından derûn-ı arzuhâlde isimleri mastûr Dimitri v. Panayot ve Yorgi v. Kostandi nâm zimmîler muvâcehelerinde yedimde olup iki yüz kırk altı senesi şehr-i Rebî‘ülevveli gurresi târîhiyle müverrah bir kıt‘a temessük mantûkunca benim gāib ani’l-beled Bakkāl Yani v. Metro zimmî zimmetinde cihet-i karzdan alacak hakkım olan iki bin üç yüz altmış guruşa mersûmân Dimitri ve Yorgi ve gāib ani’l-beled Bakkāl Tanaş v. Mitro zimmîler tarafından bi’l-emr ve’l-kabûl kefâlet-i sahîha-i şer‘iyye ile ma‘an kefîl ve zâmin olduklarından sonra ben alacağım olan meblağ-ı mezkûrun bin yüz elli dört guruşunu asîl-i gāib-i mersûm Yani zimmî yedinden mukaddemâ kabz ve istîfâ etmemle bâkīsi olan bin ikiyüz elli guruşdan mersûmân Dimitri ve Yorgi zimmîlerin hisselerine isâbet eden sekiz yüz dört guruşu mersûmân Dimitri ve Yorgi zimmîlerin kefâlet-i mahkiyelerine binâen hâlâ taleb ederim deyü ba‘de’d-da‘vâ ve’l-inkâr müdde‘î-i merkūm Mehmed Salih ber-minvâl-i muharrer kefâlet müdde‘âsına ikāmet-i beyyine edemeyip talebiyle mersûmân Dimitri ve Yorgi zimmîlerden her birine bi’l-muvâcehe vech-i şer‘î üzere yemîn verilmeğin mûcebiyle müdde‘î-i merkūm Mehmed Salih da‘vâ-yı mezkûresiyle mesfûrân Dimitri ve Yorgi zimmîlerden her birine bilâ-beyyine mu‘ârazadan men‘ olundukları huzûr-ı âlîlerine i‘lâm olundu.
Fî 23 Ra sene [1]256.
|