|
Anadolu Sadâreti Mahkemesi 2 Numaralı Sicil (H. 1251-1257/ M. 1835-1841) cilt: 94, sayfa: 111 Hüküm no: 83 Orijinal metin no: [16a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.
Mehir ve eşya bedelinden olan borcunu ödemesi hususunda Yağcı Hasan Efendi’ye tenbihte bulunulması
Ma‘rûz,
Medîne-i Üsküdar’a muzâfe Kādı karyesinde sâkine mu‘arrefetü’z-zât Âişe bt. Süleyman nâm hatun arzuhâli bâlâsına sâdır olan fermân-ı âlîlerine imtisâlen Salı günü huzûr-ı hazret-i fetvâ-penâhîde ma‘kūd meclis-i şer‘-i münîrde hâlâ zevci Yağcı Hasan Efendi b. Mustafa nâm kimesne muvâcehesinde mezbûr Hasan Efendi sekiz yüz guruş mehr-i mu‘accel ve beş yüz guruş mehr-i müeccel tesmiyeleriyle zevc-i dâhilim olup lâkin mehr-i mu‘accel-i mezkûrum olup zimmetinde hakkım olan sekiz yüz guruşu henüz bana edâ ve îfâ etmemekle suâl olunup mehr-i mu‘accel-i merkūm sekiz yüz guruş ile malımdan bi-gayr-ı hakkın ahz ve âhar menziline nakledip el-yevm mevcûd olan bir elmas çiçek ve bir sırmalı işleme mir’ât ve bir çift fular ve bir çift tahta pâbuşu ve bir sedefli çekmeceyi bi-a‘yânihâ bana teslîme zevcim mezbûr Hasan Efendi’ye tenbîh olunmak matlûbumdur deyü da‘vâ etdikde, ol dahi cevâbında müdde‘iyye-i merkūme Âişe Hatun mehreyn-i merkūmeyn tesmiyeleriyle zevce-i menkûha-i medhûlün-bihâsı ve mehr-i mu‘accel-i mezkûr sekiz yüz guruş el-yevm zimmetinde deyni ve zevce-i müdde‘iyye-i mezbûrenin malından olarak zikirleri mürûr eden elmas çiçek ve mir’ât ve fular ve tahta pâbuş ve çekmeceyi dahi ber-minvâl-i muharrer ahz u kabz edip el-yevm yedinde mevcûd olduğunu tâyi‘an ve kat‘iyyen ikrâr ü i‘tirâf etmeğin mûcebince mehr-i mu‘accel-i merkūm sekiz yüz guruş ile sâlifü’z-zikr elmas çiçek ve mir’ât ve fular ve pâbuş ve çekmeceyi bi-a‘yânihâ zevcesi müdde‘iyye-i merkūme Âişe Hatun’a edâ ve teslîme mezbûr Hasan Efendi’ye tenbîh olunduğu huzûr-ı âlîlerine i‘lâm olundu.
Fî 14 Ca sene [1]256.
|