.:: İstanbul Kadı Sicilleri ::.


Anadolu Sadâreti Mahkemesi 2 Numaralı Sicil (H. 1251-1257/ M. 1835-1841)
cilt: 94, sayfa: 112
Hüküm no: 84
Orijinal metin no: [16a-3]
Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.


Mustafa Ağa’nın Medine’de inşa ettiği medresesi için vakfettiği menzilin vakfiyetinin geçerli olması

Ma‘rûz,

Ashâb-ı hayrâtdan Kili Nâzırı esbak merhûm es-Seyyid el-Hâc Mustafa Ağa b. Mustafa’nın sulbiye-i sahîha kızı olup merhûm-ı mûmâ-ileyhin hayatında Medîne-i münevvere -nevverahallâhu te‘âlâ ilâ-yevmi’l-âhirede- binâ ve ihyâsına muvaffak olduğu medrese-i şerîfesi vakfının bi’l-meşrûta mütevelliyesi sâhibe-i arzuhâl mu‘arrefetü’z-zât Şerife Nefise Hanım bi’l-ma‘iyye rü’yete memûr evkāf müfettişi mevâlî-i i‘zâmdan fazîletlü es-Seyyid Mehmed Emin Âsaf Beyefendi tarafından meb‘ûs müderrisîn-i kirâmdan kâtib Mehmed Salih Efendi hâzır olduğu hâlde Bâb-ı hazret-i fetvâ-penâhîde Sadâret-i Anadolu mutasarrıfları dâ‘îlerine tahsîs buyurulan dâirede ma‘kūd meclis-i şer‘-i münîrde mahrûse-i Galata’ya muzâfe kasaba-i Kasımpaşa’da Câmi‘-i kebîr mahallesinde sâkin bezzâz esnâfından derûn-ı arzuhâlde mezkûrü’l-ism diğer es-Seyyid el-Hâc Mustafa Ağa b. Hüseyin nâm kimesne muvâcehesinde Medîne-i münevvere-i müşârün-ileyhâ Huşü’l-Cemal nâm mahâlde vâki‘ ma‘lûmü’l-hudûd ve’l-müştemilât bir bâb menzilin arsası Şeyhü’l-haram-ı esbak merhûm İbrahim Ağa Vakfı’na senevî yirmi beş sağ guruş mukāta‘a-i kadîme ile mezbûr diğer es-Seyyid el-Hâc Mustafa Ağa’nın bâ-temessük-i mütevellî müstakılleten taht-ı tasarrufunda ve üzerinde mevcûde bi’l-cümle ebniyesi mülk olarak merhûm diğer es-Seyyid el-Hâc Mustafa Ağa’nın müstakıllen yedinde mülkü iken mezbûr diğer el-Hâc Mustafa Ağa menzil-i mezkûrun ebniye-i mevcûdesini yedinde olup bin iki yüz elli iki senesi Rebî‘ülevveli’nin on sekizinci günü târîhiyle müverraha ve ol târîhde İstanbul’da Mahmudpaşa Mahkemesi’nde hilâfeten müvellâ hâkimü’ş-şer‘-i şerîf olan mevâlî-i i‘zâmdan fazîletlü Hemşinî İbrahim Zühdü Efendi’nin imzâ ve hatemini hâvî işbu bir kıt‘a hüccet-i şer‘iyye nâtıka olduğu üzere pederim merhûm-ı mûmâ-ileyh es-Seyyid el-Hâc Mustafa Ağa’ya hayatında tarafeynden bi’l-îcâb ve’l-kabûl bâtten ve sahîhan on iki bin beş yüz guruş semen-i medfû‘ ve makbûza bey‘ ve temlîk ve arsasını dahi bâ-re’y-i mütevellî meccânen ferâğ ve tefvîz ve mahâllinde zabt ve tasarrufa tarafından taslît eylediğinde ol dahi ber-vech-i muharrer iştirâ ve temellük ve tefevvüz ve mahâllinde taslît ve zabt edip ba‘dehu pederim merhûm-ı mûmâ-ileyh menzil-i mezkûrun bi’l-cümle ebniyesini hasbeten lillâhi te‘âlâ hayatında vakf-ı mezkûruna zam ve ilhâk ve vakıf ve süknâsını dahi mütevellî bulunanlara şart ve ta‘yîn ederek huzûr-ı hâkimde tescîl-i şer‘î ve teslîm ile’l-mütevellî birle vakfiyetine hüküm olunup ol vechile menzil-i mezkûr mütevellîsi olduğum medrese-i şerîfe-i mezkûr vakfından olmuş iken yedimde olup iki yüz elli dört senesi Muharremi’l-harâmının onuncu günü târîhiyle müverrah sâbıkā Medîne-i münevvere-i müşârün-ileyhâ kādısı mevâlî-i i‘zâmdan fazîletlü Pirlepevî Hafız Ahmed Efendi’nin hatemiyle mahtûm işbu bir kıt‘a i‘lâmda tafsîl ve beyân olunduğu üzere Mısr-ı Kâhire’de sâkin sâbıkā Harem-i şerîf Kâtibi es-Seyyid Ömer Efendi tarafından vekîl-i müsbeti olan hâlâ Medîne-i münevverede Hanefî Müftüsü İlyaszâde Tâcüddin Efendi huzûr-ı şer‘de mütevelliyesi olduğum [16b] medrese-i şerîf-i mezkûr vakfının bâ-fermân-ı âlîşân kāimmakāmı bulunan Mehmed Emin Efendi b. Mustafa mahzarında hâlâ Harem-i şerîf müdürü atûfetlü Şerif Beyefendi hâzır olduğu hâlde menzil-i mezkûrun ebniye-i mevcûdesine mukaddemâ müstakıllen mâlike olan Medîne-i münevvere’de mücâvireten sâkine müteveffât Hâce Esma bt. Mustafa Kapudan nâm hatun hayatında menzil-i mezkûrun ebniye-i mevcûdesini iki yüz otuz iki senesi Cemâziyelûlâsı’nın on dokuzuncu günü vakf-ı sahîh ile vakf ve habs ve süknâsını dahi müteehhile olmayan Mora muhâcirîninden bulunan nisvâna ve tevliyeti dahi hayatında oldukça evvelâ kendüye ve ba‘de vefâtihâ müvekkilem mezbûr Ömer Efendi’ye şart ve ta‘yîn etmiş idi deyü müfti-yi mûmâ-ileyh Tacüddin Efendi kādı-i mûmâ-ileyh huzûrunda bi’l-vekâle da‘vâ ve isbât-ı müdde‘â eylediğine binâen kādı-i mûmâ-ileyh dahi menzil-i mezkûrun ber-minvâl-i muharrer mukaddem târîhiyle vakfiyetine hükm etmekle ben dahi pederim mûmâ-ileyh es-Seyyid el-Hâc Mustafa Ağa’nın merkūm diğer el-Hâc Mustafa Ağa’ya medfû‘u olan semen-i mezkûr on iki bin beş yüz guruşu mezbûr diğer es-Seyyid el-Hâc Mustafa Ağa’dan bi’t-tevliye istirdâd ederim deyü da‘vâ etdikde evvelâ ber-mûceb-i nizâm-ı müstahsene i‘lâm-ı mezkûr tatbîk için Fetvâhâne’ye irsâl olundukda işbu i‘lâmda noksân olup tescîli sâbit olmadığından mâ‘adâ sebki dahi kā‘ide-i fenn-i sakka muvâfık olmamağla ihticâca sâlih olmadığını hâlâ emînü’l-fetvâ atûfetlü Mehmed Ârif Efendi hazretleri i‘lâm etmeleriyle bu sûretde menzil-i mezkûrun mukaddem târîhiyle vakfiyeti henüz sâbit olmamış olmamağla müdde‘iyye-i mûmâ-ileyhâ Şerife Nefise Hanım’ın takrîr-i meşrûhu üzere merkūm diğer es-Seyyid el-Hâc Mustafa Ağa’dan semen-i mezkûr mütâlebesi ber-nehc-i şer‘î meşrû‘a olmadığı kendüye ba‘de’t-tefhîm menzil-i mezkûrun ber-minvâl-i muharrer mukaddem târîhiyle olan vakfiyetinin tescîli sâbit olmadıkça menzil-i mezkûrun ebniye-i mevcûdesi merhûm-ı mûmâ-ileyh el-Hâc Mustafa Ağa Vakfı’ndan olmak üzere zabt ve tasarruf olunmak iktizâ eylediği tescîl ve huzûr-ı âlîlerine i‘lâm olundu.

Fî 15 Ş sene [1]256.