.:: İstanbul Kadı Sicilleri ::.


Beşiktaş Mahkemesi 2 Numaralı Sicil (H. 966-968 / M. 1558-1561)
cilt: 42, sayfa: 188
Hüküm no: 353
Orijinal metin no: [43a-1]
Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.


Fatma bt. Hasan Çelebi’nin tüm alacaklarını vasisi Hızır b. Kemal’den alıp zimmetini ibrâ ettiği

Yevmü’l-Cum‘a, fî 16

Vech-i tahrîr-i sicil oldur ki

Arablı mahallesinde fevt olan Hasan Çelebi b. Musa eş-şehîr bi Tombazoğlu evlâd-ı sıgārı olan Mehmed ve Fâtıma nâm sagīrlere sâbıkā vasiyy-i muhtâr olan Hızır b. Kemal hâce-i bahçe-i Kara Bâli nâm [kimesne] mahfil-i şer‘a hâzır olup vasî[si] olduğum Mehmed dahi fevt olup muhallefâtı li-eb ve üm kız karındaşı Fâtıma’ya intikāl eder cem‘an otuz yedi bin yüz seksen akçe-i asıldan ve ribhden cümle [meblağ-ı] mezkûru Fâtıma’ya verip teslîm etdim min ba‘d zimmetimde bir habbe hakkı kalmadı dedikde mukırr-ı mezbûrun ikrârı ve takrîr-i kelâmı vicâhen mezkûrenin hâliyâ zevci Ali Bey, Mevlânâ Alâeddin Halîfe b. Abdünnebi ve bahçe ustalarından Ahmed Usta b. Abdullah şehâdetleriyle vekâleti sâbit oldukdan sonra kabûl ve tasdîk edip mâ vaka‘a bi’t-taleb kayd olundu.

Şuhûd: Mevlânâ Mehmed b. Veli el-imâm, Mehmed b. Abdullah, Mevlânâ Hasan b. Ahmed, Ömer Çelebi b. Balaban, Abdişah b. Kasım, Mahmud Sofu b. Abdullah, Usta Ahmed b. Abdullah, Mehmed Usta b. Abdullah ve gayruhüm mine’l-hâzırîn.