.:: İstanbul Kadı Sicilleri ::.


Anadolu Sadâreti Mahkemesi 2 Numaralı Sicil (H. 1251-1257/ M. 1835-1841)
cilt: 94, sayfa: 114
Hüküm no: 85
Orijinal metin no: [16b-1]
Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.


Vefat eden Paris bt. Canik’in tereke listesi

Medîne-i Üsküdar-ı meymenet-âsâra muzâfe Kandilli karyesinde mütemekkine iken bundan akdem hâlike olan Paris bt. Canik Nasrâniyenin verâseti zevc-i metrûku Sarrâf Goncagüloğlu Melkon v. Toros zimmî ile babası mersûm Sarrâflar Kâhyası Hoca Canik v. Simyon ve anası Tartohi bt. Karabet ve sadriye sagīre kızları Takohi ve Derohi ve sadrî sagīr oğlu Kirkor’a münhasıra olduğu şer‘an zâhir ve mütehakkık oldukdan sonra sıgār-ı mersûmûnun babaları ve velîleri mersûm Melkon zimmî ve mersûmân Hoca Canik ve Tartohi Nasrâniye tereke-i hâlike-i mersûmeyi kendileri âhara bey‘ ve semenlerini ba‘de’l-kabz taleb ve ma‘rifetleriyle tahrîr ve taksîm olunan tereke-i hâlike-i mersûmedir ki ber-vech-i âtî zikr olunur.

Fî-gurreti C sene [1]256.

Elmas çiçek 2 aded 5.000 guruş Elmaslıca kuşak 1 aded 1.500 guruş Elmas küpe 1 çift 2.500 guruş Elmas Zihgîr 1 aded 1.500 guruş Zümrüd yüzük 1 aded 1.000 guruş Çuka ferâce 3 aded 450 guruş Elvân anteri 9 aded 1.300 guruş Hâkî top 1 aded 200 guruş Hamam takımı 1 aded 200 guruş Kısa elvân kürk 3 aded 800 guruş Elvân şal, müsta‘mel 3 aded 4.000 guruş Elvân kürk kapı 3 aded 150 guruş Bir mikdâr evânî-i sîm 250 guruş Sandık 1 aded 100 guruş Nakd-i mevcûd 650 guruş Oya berce gömlek 8, çorap 5 çift, berce canfes 2, çevre 100, yemenî 5, fes 2 ve hırdavat 750 guruş

Yekûn:

20.250 guruş

00537 guruş resm-i kısmet ve kaydiye-i defter

19.713 guruş sahhu’l-bâkī li’t-taksîm beyne’l-verese

Hissetü’z-zevci’l-mersûm 4.928 guruş 30 akçe Hissetü’l-ebi’l-mersûm 3.285,5 guruş Hissetü’l-ümmi’l-mersûme 3.285,5 guruş Hissetü’l-binti’l-mersûme 2.053 guruş 52 akçe Hissetü’l-binti’l-mersûme 2.053 guruş 52 akçe Hissetü’l-ibni’l-mersûm 4.106,5 guruş 44 akçe Küsür 2 akçe

Sıgār-ı mersûmûnun bâlâda muharrer hisse-i irsiyeleri olan cem‘an sekiz bin iki yüz on üç buçuk guruş otuz akçeyi veli-yi mersûm Melkon zimmî bi’l-velâye zabt ve bilâ-zarûret kendi umûruna sarfla istihlâk edip zimmetinde sıgār-ı mersûmûna vâcibü’l-edâ deyni olduğunu huzûr-ı şer‘de ba‘de’l-ikrâr emriyle mukırr-ı mersûmun ammi oğlu Sarrâf Karabet v. Bağdisar ve yeğenleri Serkiz ve Bedros zimmîlerden her biri meblağ-ı merkūm sekiz bin iki yüz on üç buçuk guruş otuz akçeye kefâlet-i mutlaka-i sahîha-i şer‘iyye ile her biri müte‘âkiben kefîl bi’l-mâl ve zâmin olduklarında tashîhan li’l-kefâle vasî nasb olunan Muhzır Mehmed Ağa b. Ahmed dahi kefâlet-i merkūmeyi kabûl eylediği bu mahalle şerh olundu.