.:: İstanbul Kadı Sicilleri ::.


Anadolu Sadâreti Mahkemesi 2 Numaralı Sicil (H. 1251-1257/ M. 1835-1841)
cilt: 94, sayfa: 115
Hüküm no: 86
Orijinal metin no: [17a-1]
Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.


Şerbethaneci Abram’ın Arabacı Hasan Ağa’dan borç alması

Mahrûse-i Galata’da Beyoğlu nâm mahâlde Kamer Hatun mahallesinde mütemekkin Şerbethâneci Abram v. Andon zimmî meclis-i şer‘-i şerîf-i enverde müteveffâ Tatar Mehmed İzzet Ağa li-ebeveyn kız karındaşı oğlu Arabacı Hasan Ağa b. Mehmed Tahir mahzarında ikrâr ve takrîr-i kelâm edip mahalle-i mezbûrede kâin Sekyas Koltuğu ta‘bîr olunur bir bâb şerbethâne derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmenin yüz yirmi sehm i‘tibârıyla yedimde malım ve mülküm olan altmış sehm hisse-i şâyi‘asını mezbûr Hasan Ağa’nın malından zikri âtî istidâne ve kabz edeceğim meblağ mukābelesinde rehin vaz‘ ve mezbûr Hasan Ağa’ya teslîm eylediğimde ol dahi yedimden ber-vech-i muharrer irtihân ve kabz ve kabûl etdikden sonra mezbûr Hasan Ağa malından bana on iki bin beş yüz guruş idâne ve teslîm eylediğinde, ben dahi yedinden istidâne ve kabz edip meblağ-ı mezbûr ile semeni işbu vesîkadan üç sene tamâmına değin müeccel ve mev‘ûd yine mezbûr Hasan Ağa’nın malından ve yedinden iştirâ ve kabz eylediğim bir hilâlî sâ‘at semeninden dahi beş bin altı yüz yirmi beş guruş ki cem‘an on sekiz bin yüz yirmi beş guruş zimmetimde mezbûr Hasan Ağa’ya vâcibü’l-edâ deynim olup zikr olunan altmış sehm âlât-ı muharrere-i mezkûreyi mezbûr Hasan Ağa yine bana îdâ‘ ve teslîm, ben dahi yedinden istîd‘â ve kabz ü kabûl etmemle ol vechile âlât-ı muharrere-i mezkûre hâlâ rehin olmak üzere yedimde alâ-tarîkı’l-emâne mahfûzdur dedikde gıbbe’t-tasdîk Ustabaşı Sarrâfoğlu İstefan v. Tatos ve Ustabaşı Rokos v. Vartan ve mârru’z-zikr Beyoğlu nâm mahâlde Hüseyin Ağa mahallesinde mütemekkinler Şerbethâneci Aci Aranik v. Ohannes ve Şerbethâneci Nikoli v. Apostol ve Şerbethâneci diğer Nikoli v. Panayot ve Şerbethâneci Alesan v. Panayot ve Şerbethâneci Simyon v. Karabet zimmîler meclis-i şer‘-i şerîf-i enverde mezbûr Hasan Ağa mahzarında ikrâr ve takrîr-i kelâm edip mukırr-ı mersûm Abram zimmînin zimmetinde mezbûr Hüseyin Ağa’ya edâsı vâcib deyni olan meblağ-ı mecmû‘-ı mezkûr on sekiz bin yüz yirmi beş guruşa tarafeynden bi’l-emr ve’l-kabûl kefâlet-i mutlaka-i sahîha-i şer‘iyye ile her birimiz müte‘âkiben kefîl bi’l-mâl ve zâminiz dediklerinde gıbbe’t-tasdîki’ş-şer‘î mâ-vaka‘a bi’t-taleb ketb olundu.

Fî-gurreti C sene [1]256.

Şuhûdü’l-hâl: Mektûbî Mehmed Raif Efendi, Mehmed Şakir Molla, Muhzır Eğrikapılı Mehmed Ağa, Tahtacı Mehmed Salih Ağa.