|
Anadolu Sadâreti Mahkemesi 2 Numaralı Sicil (H. 1251-1257/ M. 1835-1841) cilt: 94, sayfa: 116 Hüküm no: 87 Orijinal metin no: [17a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.
Anaştaşiye bt. Manol’un varisleri Hıristo, Kutni, Eleniko ve Panayot’un, Yani v. Panayot aleyhindeki menzil davalarının meşru olmadığı
Ma‘rûz,
Medîne-i Üsküdar’a muzâfe Gekbüze nâhiyesine tâbi‘ Darıca karyesi mütemekkinlerinden olup medîne-i mezkûre nevâhîsinden Kartal nâhiyesine tâbi‘ Ada-i kebîr’de mütemekkin iken işbu târîhden sekiz ay mukaddem hâlike olan Anaştaşiye bt. Manol v. Adam Nasrâniyenin verâseti zevc-i metrûku Hıristo v. Mihal ve sadrî kebîr oğlu Mihal zimmîler ile sadriye kebîre kızları Kutnî ve Eleniko ve Panayot evlâdi’l-mersûm Hıristo Nasrâniyelere münhasıra ve tashîh-i meselesi yirmi sehmden olup sihâm-ı mezbûreden beş sehmi zevci mersûme ve altı sehmi oğlu mesfûra ve üçer sehmden cem‘an dokuz sehmi kızları mersûmâtdan her birine isâbeti tahakkukundan sonra ashâb-ı arzuhâl ibn-i mersûm Mihal zimmî ile şahısları mu‘arrefeler benât-ı mesfûrât Kutnî ve Eleniko ve Panayot Nasrâniyelerden her biri Bâb-ı hazret-i fetvâ-penâhîde Anadolu mutasarrıfları dâ‘îlerine tahsîs buyurulan dâirede ma‘kūd meclis-i şer‘-i hatîrde karye-i mezkûre re‘âyâsından olup zikri âtî menzile el-yevm vaz‘-ı yedi mütehakkık olan derûn-ı arzuhâlde mastûrü’l-ism Yani v. Panayot nâm zimmî muvâcehesinde mersûmûnun babaları kezâlik derûn-ı arzuhâlde ismi mastûr mersûm Hıristo zimmî hâzır olduğu hâlde karye-i mezkûrede vâki‘ bir tarafdan Hamaşoğlu? Simyon ve bir tarafdan Çolak Corci zimmîler menzilleri ve bir tarafdan dere ve taraf-ı râbi‘i tarîk-i âm ile fevkānî iki bâb oda ve bir sofa ve bir memşâ ve tahtında bir matbah ve bir mikdâr havluyu müştemil bir bâb mülk menzil anamız hâlike-i mersûmenin sağlığında ile’l-helâk bâ-hüccet-i şer‘iyye müstakılleten yedinde malı ve mülkü olup ba‘de helâkihâ ber-tashîh-i mezkûr bizimle babamız hâzır-ı mersûma mevrûs olmuş iken mesfûr Yani zimmî menzil-i mahdûd-ı mezkûru bi-gayr-ı hakkın zabt ve vaz‘-ı yed eder, suâl olunup keff-i yed birle bizimle babamız hâzır-ı mersûma mahâllinde teslîme mesfûr Yani zimmîye tenbîh olunmak matlûbumuzdur deyü hâzır-ı mersûm Hıristo zimmî ile ma‘an da‘vâ etdiklerinde ol dahi cevâbında menzil-i mahdûd-ı mezkûr hâlike-i mesfûre Anaştaşiye Nasraniye sağlığında zevci hâzır-ı mersûm ile bi’l-münâsafe yedlerinde mülkleri iken yedimde olup bin iki yüz otuz dokuz senesi Muharremi’l-harâmının beşinci günü târîhiyle müverraha Üsküdar Mahkemesi sicillâtından muhrec işbu bir kıt‘a hüccet nâtıka olduğu üzere hâzır-ı mesfûr Hıristo zimmî asâleten ve zevcesi hâlike-i mersûme Anaştaşiye Nasrâniye tarafından vekîl-i müsbet-i şer‘iyyesi olmağla vekâleten menzil-i mahdûd-ı mezkûru cemî‘ müştemilâtıyla tarafeynden bi’l-îcâb ve’l-kabûl bâtten ve sahîhan bin eli guruş semen-i medfû‘ ve makbûza bana bey‘ ü temlîk ve teslîm eylediğinde ben dahi ber-vech-i muharrer iştirâ ve temellük ve tesellüm ve kabz ü kabûl eylediğimden sonra bey‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini ibrâ-i âmm-ı sahîh-i şer‘î ile kabûlü hâvî bi’l-asâle ve bi’l-vekâle ibrâ ve iskāt etmemizle ol vechile menzil-i mahdûd-ı mezkûr târîh-i merkūmdan beri şirâen mülküm olduğuna binâen bi-hakkın zabt ve tasarruf ederim deyü [17b] eylediği takrîrini ve mazmûn-ı hüccet-i mezkûreyi müdde‘ûn-ı mesfûrûn Mihal zimmî ve Kutnî ve Eleniko ve Panayot Nasrâniyeler ile hâzır-ı mersûm Hıristo zimmîden her biri bi-tamâmihî tâyi‘an ve kat‘iyyen ikrâr ve tasdîk etmeleriyle mûcebince müdde‘ûn-ı mersûmûn Mihal zimmî ve Kutnî ve Eleniko ve Panayot Nasraniyeler ile hâzır-ı mersûm Hıristo zimmînin tasaddî eylediği da‘vâları meşrû‘a ve iltifâta şâyân olmadığı kendülere tefhîm ve da‘vâ-yı mezkûreleriyle mesfûr Yani zimmîye bî-vech-i şer‘î mu‘ârazadan ba‘de’l-men‘ bu sûretde menzil-i mahdûd-ı mezkûr mersûm Yani zimmînin ber-minvâl-i muharrer şirâen mülkü olmak üzere kemâ-kân zabt ve tasarrufu iktizâ eylediği huzûr-ı âlîlerine i‘lâm olundu.
Fî 8 Ca sene [1]256.
|