.:: İstanbul Kadı Sicilleri ::.


Anadolu Sadâreti Mahkemesi 2 Numaralı Sicil (H. 1251-1257/ M. 1835-1841)
cilt: 94, sayfa: 118
Hüküm no: 89
Orijinal metin no: [17b-2]
Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.


Firar eden Tütüncü Matyos’un kilitli bıraktığı dükkânında bulunan eşyasının listesi

Tütüncü esnâfından olup medîne-i Üsküdar’da Yeni mahallede berber dükkânı karşısında menzil tahtında kâin ma‘lûmü’l-hudûd bir bâb Tütüncü dükkânında müşâhereten müsteciren mütemekkin olan Matyos v. Ohan zimmî dükkân-ı mezkûru mukaffelen terk ve ta‘tîl birle işbu târîhden iki ay mukaddem diyâr-ı âhara firâr ve gaybet-i münkatı‘a ile gāib ve mefkūd olmağla dükkân-ı mezkûrun kuflü ma‘rifet-i şer‘le feth ü küşâd ve derûnunda mevcûd mefkūd-ı mersûmun mütesâri‘ü’l-fesâd olan malı tahrîr ve semen-i misilleriyle âhara bey‘ olunup esmânı mefkūd-ı mesfûrun hâli mütebeyyin oluncaya değin li-ecli’l-hıfz yed-i emîne vaz‘ birle dükkân-ı merkūm kendüye teslîm olunmasını dükkân-ı mezkûr derûnunda mevcûde beyne’l-esnâf tütüncü gediği ta‘bîr olunur âlât-ı lâzıme-i ma‘lûmenin müstakıllen mâlik olan Aci Ağya v. Abranos nâm zimmî bâ-arzuhâl istid‘â ve ol bâbda sâdır olan fermân-ı âlîlerine imtisâlen savb-ı şer‘-i enverden irsâl olunan müderrisîn-i kirâmdan Kâtib es-Seyyid Ahmed Hıfzı Efendi ma‘an meb‘ûs ümenâ-i şer‘le dükkân-ı mezkûra varıp esnâf-ı merkūme Kethüdâvekîli Mustafa Ağa b. el-Hâc Mehmed ve esnâf-ı merkūmeden Mehmed Efendi b. Mehmed Tahir ve Mehmed Ağa b. Mehmed nâm kimesneler ile köşe ustası Agob v. Avanos ve Danyel v. Bogos ve Hıristo v. Afram nâm zimmîler hâzır oldukları hâlde dükkân-ı mezkûrun kuflünü feth ü güşâd ve mefkūd-ı mersûmun dükkân-ı merkūmda olup mütesâri‘ü’l-fesâd olan eşyâsını tahrîr ve semen-i misilleriyle âhara bey‘ birle esmânı mefkūd-ı mersûmun hâli tebeyyün oluncaya değin emîn ve müstakīm idüğü ihbâr olunup kıbel-i şer‘den bi’l-kabûl kayyım nasb olunan Tahmîsönü’nde Kurukahveci Galatalı Mustafa Ağa b. Abdullah nâm kimesne yedine teslîm olunan eşyânın defteridir ki ber-vech-i âtî zikr olunur.

Fî 27 Ca sene [1]256.

Toprak desti ve tencere ve bardak ve ibrik ve humbara 220 guruş Çam dolap ve eczâ ve attâriye ve sâir hırdavat 280 guruş

Minhe’l-ihrâcât

Dellâliye-i eşyâ 2 guruş Harc-ı defter 10 guruş Yekûn 12 guruş

Sahhu’l-bâkī 388 guruş (Yalnız üç yüz seksen sekiz guruşdur)

Sahhu’l-bâkī merkūm üç yüz seksen sekiz guruşu kayyım-ı mezbûr Mustafa Ağa bi’l-vesâye kabz ve kendi umûruna sarfla istihlâk edip mefkūd-ı mersûma zimmetinde damânen deyni olduğunu mahâllinde kâtib-i mûmâ-ileyh huzûrunda ikrâr ü i‘tirâf ve emriyle meblağ-ı bâkī-i mezkûr üç yüz seksen sekiz guruşa esnâf-ı mezbûreden merkūmân Mustafa Ağa b. el-Hâc Mehmed ve Mehmed Efendi b. Mehmed Tahir nâm kimesnelerden her biri kefâlet-i mutlaka-i sahîha-i şer‘iyye ile müte‘âkiben kefîl ve zâmin olduklarında tashîhan li’l-kefâle vasî nasb olunan Mehmed Salih Ağa b. Mehmed dahi kefâlet-i mezkûrelerini kabûl eylediğini meclis-i şer‘-i şerîfe inhâ eylediği işbu mahalle şerh verildi.