.:: İstanbul Kadı Sicilleri ::.


Anadolu Sadâreti Mahkemesi 2 Numaralı Sicil (H. 1251-1257/ M. 1835-1841)
cilt: 94, sayfa: 119
Hüküm no: 90
Orijinal metin no: [18a-1]
Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.


Mehmed Şemseddin Efendi’nin küçük oğlu Ahmed Tevfik Molla’dan borç alması

Medîne-i Üsküdar-ı meymenet-âsârda Açık Türbe kurbünde Ahmed Çelebi mahallesinde sâkin iken bundan akdem vefât eden Hâce Şerife Âişe Sıdıka Hanım ibneti’l-merhûm el-Hâc Ali Bey’in sadrî sagīr oğlu es-Seyyid Ahmed Tevfik Molla’nın pederi ve velîsi müderrisîn-i kirâm-ı zevi’l-ihtirâmdan es-Seyyid Mehmed Şemseddin Efendi b. el-merhûm sadr-ı vâlâ-yı Rumeli-yi esbak Mustafa Molla Efendi meclis-i şer‘-i şerîf-i enverde sagīr-i mezbûra tashîhan li’s-sakk vasî nasb olunan Muhzır yamağı Ali Ağa b. Mehmed mahzarında ikrâr ve takrîr-i kelâm edip velîsi olduğum oğlum sagīr-i mezbûrun malından on altı bin yüz on üç buçuk guruş elli akçe ben bi’l-velâye kabz ve bilâ-zarûretin kendi umûruma sarfla istihlâk etmemle meblağ-ı merkūm ile semeni işbu târîh-i kitâbdan üç sene tamâmına değin müeccel ve mev‘ûd yine sagīr-i mezbûrun malından vasiyy-i mezbûr Ali Ağa yedinden zı‘f-ı kıymetiyle iştirâ ve kabz eylediğim bir hilâlî sâ‘at semeninden dahi yedi bin iki yüz elli bir guruş otuz akçe ki cem‘an yirmi üç bin üç yüz altmış beş guruş yirmi akçe zimmetimde velîsi olduğum oğlum sagīr-i mezbûra vâcibü’l-edâ deynimdir dedikde gıbbe’t-tasdîk medîne-i mezbûrede Selimiye’de sâkin müderrisîn-i kirâm-ı zevi’l-ihtirâmdan Hamâmîzâde hafîdi es-Seyyid Ali Rıza Efendi b. es-Seyyid Mehmed Tevfik Efendi ve medîne-i mezbûreye muzâfe Beylerbeyi nâm mahâlde sâkin sagīr-i mezbûrun li-ebeveyn hâli zu‘amâdan es-Seyyid el-Hâc Mehmed Said Bey ve mahmiye-i İslambol’da Şengül Hamamı kurbünde sâkin Hâcegân-ı Dîvân-ı hümâyûn’dan vüzerâ-yı i‘zâm kapıkethüdâsı es-Seyyid Hüseyin Kenan Efendi b. es-Seyyid Hüseyin meclis-i şer‘-i şerîf-i enverde vasiyy-i mezbûr Ali Ağa mahzarında her biri ikrâr ve takrîr-i kelâm edip mukırr-ı mûmâ-ileyh es-Seyyid Mehmed Şemseddin Efendi’nin zimmetinde oğlu sagīr-i mezbûra edâsı vâcib deyni olan meblağ-ı mecmû‘-ı mezkûr yirmi üç bin üç yüz altmış beş guruş yirmi akçeye tarafeynden bi’l-emr ve’l-kabûl kefâlet-i mutlaka-i sahîha-i şer‘iyye ile biz dahi müte‘âkiben kefîl bi’l-mâl ve zâminiz dediklerinde gıbbe’t-tasdîki’ş-şer‘î mâ-vaka‘a bi’t-taleb ketb olundu.

Fî 15 S sene [1]256.

Şuhûdü’l-hâl: Vekāyi‘ Yamağı Hıfzı Efendi, Kuzâtdan es-Seyyid Ali Efendi, Muhzır es-Seyyid Ahmed Nuri Efendi, Küçük Hasan Ağa tâbi‘-i muhzır, Münâdî Abdülhamid Ağa.