|
Anadolu Sadâreti Mahkemesi 2 Numaralı Sicil (H. 1251-1257/ M. 1835-1841) cilt: 94, sayfa: 120 Hüküm no: 91 Orijinal metin no: [18a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.
Vefat eden Ayşe Sıdıka Hanım’ın oğlu Ahmed Tevfik Molla’ya nafaka tahsisi
Medîne-i Üsküdar-ı meymenet-âsârda Açık Türbe kurbünde Ahmed Çelebi mahallesinde sâkine iken bundan akdem vefât eden Hâce Şerife Âişe Sıdıka Hanım bt. el-merhûm el-Hâc Ali Bey’in sadrî sagīr oğlu es-Seyyid Ahmed Tevfik Molla’nın pederi ve velîsi müderrisîn-i kirâm-ı zevi’l-ihtirâmdan işbu bâ‘isü’l-kitâb es-Seyyid Mehmed Şemseddin Efendi b. el-merhûm Sadr-ı vâlâ-yı Rumeli-yi esbak Mustafa Molla Efendi talebiyle hâkim-i hâsim-i velâ cenâbi’l-muvakkı‘-ı ismühû fî-sadri’l-kitâb -veffakahallâhu te‘âlâ ilâ-sebîli’s-sevâb- efendi hazretleri sagīr-i mezbûra malı nemâsından işbu târîh-i kitâbdan kadr-ı ma‘rûf idüğü ihbâr olunan beher şehr iki yüz guruş nafaka ve kisve-bahâ farz ve takdîr buyurup meblağ-ı mefrûz-ı mezkûr beher şehr iki yüz guruşu sagīr-i mezbûrun nafaka ve kisve ve sâir levâzım-ı zarûriyesine harc ü sarfa ve vakt-i hâcetde istidâneye ve lede’z-zafer sagīr-i mezbûrun malı nemâsına rücû‘a pederi mûmâ-ileyh es-Seyyid Mehmed Şemseddin Efendi’ye izin vermeğin mâ-vaka‘a bi’t-taleb ketb olundu.
Fî 15 S sene [1]256.
Şuhûdü’l-hâl: Müderrisîn-i kirâmdan es-Seyyid Ali Rıza Efendi, Zü‘amâdan el-Hâc Mehmed Said Bey Vekāyi‘ Yamağı Hıfzı Efendi, Muhzır es-Seyyid Ahmed Nuri Ağa, Ali Ağa tâbi‘-i muhzır.
|