.:: İstanbul Kadı Sicilleri ::.


Anadolu Sadâreti Mahkemesi 2 Numaralı Sicil (H. 1251-1257/ M. 1835-1841)
cilt: 94, sayfa: 126
Hüküm no: 93
Orijinal metin no: [19b-1]
Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.


Fâtıma bt. Abdullah’ın mecnun olan eşi Selim Ağa’dan boşanması

Ma‘rûz,

Medîne-i Üsküdar’da Mirahur mahallesinde sâkine sâhibe-i arzuhâl mu‘arrefetü’z-zât Fâtıma bt. Abdullah nâm Hatun Bâb-ı hazret-i fetvâ-penâhîde Sadâret-i Anadolu mutasarrıfları dâ‘îlerine tahsîs buyurulan dâirede ma‘kūd meclis-i şer‘-i münîrde medîne-i mezkûrede Ahmediye mahallesi sükkânından olup bundan akdem bâ-irâdetillâhi te‘âlâ cünûn-ı mutbık târî ve el-yevm mecnûn olan derûn-ı arzuhâlde mezkûrü’l-ism el-Hâc Selim Ağa b. Abdullah’ın vakt-i ifâkatine değin malını hıfz ve umûrunu rü’yete kıbel-i şer‘den bâ-i‘lâm-ı şer‘î vasî nasb u ta‘yîn olunan Zenneci el-Hâc Mehmed Ağa b. Mehmed nâm kimesne muvâcehesinde mecnûn-ı mezbûr el-Hâc Selim Ağa beni sene-i sâbıkā Şevvâli’l-mükerreminin yirmi beşinci günü bin beş yüz guruş mehr-i müeccel tesmiyesiyle sâlifü’z-zikr Hamidiye mahallesinde menzilinde bir takrîb cünûnu hâlinde tezevvüc ve duhûl edip lâkin mezbûr el-Hâc Selim Ağa ber-vech-i muharrer cünûnu hâlinde beni akd-i tezevvücü şer‘an sahîh olmadığına binâen beynimiz tefrîk ve tesmiye olunan mehr-i müeccel-i mezkûr bin beş yüz bir guruş mehr-i mislimden ekall olmağla mehr-i müsemmâ-yı mezkûru mecnûn-ı merkūmun malından bana edâya vasiyy-i mezbûr el-Hâc Mehmed Ağa’ya tenbîh olunmak matlûbumdur deyü da‘vâ etdikde vasiyy-i mezbûr el-Hâc Mehmed Ağa dahi vasîsi olduğum mezbûr el-Hâc Selim Ağa eğerçi el-yevm cünûn-ı mutbık ile mecnûn olup ancak mezbûr el-Hâc Selim Ağa müdde‘iyye-i mezbûre Fâtıma Hatun’u mehr-i müsemmâ-yı mezkûr ile târîh-i merkūmda âkıl ve reşîd ve cemî‘ tasarrufâtı nâfiz olduğu hâlde tezevvüc ve duhûl etmiş idi deyüp husûs-ı mezkûrda akl beyyinesi evlâ olduğundan evvelâ mecnûn-ı mezbûr el-Hâc Selim Ağa müdde‘iyye-i merkūmeyi hîn-i tezevvücünde âkıl ve reşîd olmadığına vasiyy-i mezbûr el-Hâc Mehmed Ağa’dan beyyine taleb olundukda ikâmet-i beyyineden izhâr-ı acz etmeğin bu sûretde müdde‘iyye-i mezbûre Fâtıma Hatun kendüyü mecnûn-ı merkūm el-Hâc Selim Ağa mehr-i müeccel-i mezkûr tesmiyesiyle zevc eylediği hînde cünûn-ı mutbık ile mecnûn olduğunu kizb üzerine tevâtürleri mutasavver olmayan bî-garaz Müslimînden medîne-i mezbûrede Kefçe Dede mahallesi İmâmı Hafız es-Seyyid Hasan Efendi b. Ömer ve Muhtar-ı evveli el-Hâc Mehmed Said Efendi b. Musa ve sâlifü’z-zikr Mirahur mahallesi ahâlîsinden Haydar Paşa livâsı binbaşılarından el-Hâc Hasan Ağa b. Abdullah ve el-Hâc Hurşid Ağa b. Abdullah ve Mustafa b. el-Hâc Hasan ve Balıkçı Ahmed b. İbrahim ve Kayıkçı es-Seyyid Ahmed b. Ali ve Mehmed b. Mustafa nâm kimesneler tevâtüren bi’l-muvâcehe alâ-tarîkı’ş-şehâde haberleriyle zâhir ve mütehakkık olmağın mûcebince merkūme Fâtıma Hatun ile mecnûn-ı mezbûrun beynleri tefrîk ve tesmiye olunan mehr-i mezkûr müdde‘iyye-i mezbûre Fâtıma Hatun’un mehr-i mislinden ekall olmağla mehr-i müsemmâ-yı mezkûru mecnûn-ı mezbûrun malından müdde‘iyye-i mezbûre Fâtıma Hatun’a edâ ve teslîme vasiyy-i mezbûr el-Hâc Mehmed Ağa’ya ba‘de’t-tenbîh mezbûre Fâtıma Hatun yine meclis-i şer‘de vasiyy-i mezbûr el-Hâc Mehmed Ağa muvâcehesinde takrîr-i kelâm edip ben ânifen edâsına hükm ve tenbîh olunan mehr-i müeccel-i mezkûrum olan bin beş yüz bir guruş mütâlebesine ve hukūk-ı sâire-i şer‘iyyeye müte‘allika âmme-i da‘vâdan mecnûn-ı mezbûrun zimmetini ibrâ-i âmm-ı sahîh-i şer‘î ile ibrâ ve iskāt eylediğimde vasiyy-i mezbûr el-Hâc Mehmed Ağa dahi ibrâ-i mezkûrumu bi’l-vesâye kabûl eyledi deyü ikrâr ve tasdîkleri tescîl ve huzûr-ı âlîlerine i‘lâm olundu.

Fî 20 R sene [1]256.