|
Anadolu Sadâreti Mahkemesi 2 Numaralı Sicil (H. 1251-1257/ M. 1835-1841) cilt: 94, sayfa: 128 Hüküm no: 94 Orijinal metin no: [20a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.
Mehmed İzzet ve Mehmed Nazif kardeşlerin vefat eden Camcı Mustafa’ya varis oldukları
Ma‘rûz,
Medîne-i Üsküdar’da Rum Mehmed Paşa mahallesinde sâkin iken işbu sene-i mübâreke şehr-i Rebî‘ülevveli gurresinde vefât eden Camcı el-Hâc Mustafa’nın li-ebeveyn er karındaşı müteveffâ Mehmed’in sulbî sahîh oğlu müteveffâ Ömer’in sulbî sahîh oğulları ve usûbet-i nesebiye cihetinden vârisleri olup ber-vech-i âtî verâset iddi‘â eden sâhibey-i arzuhâl Mehmed İzzet ve Mehmed Nazif nâm kimesnelerden her biri Bâb-ı hazret-i fetvâ-penâhîde sadâret-i Anadolu mutasarrıfları dâ‘îlerine tahsîs buyurulan dâirede ma‘kūd meclis-i şer‘-i münîrde müteveffâ-yı mezbûrun veresesinden zevce-i menkûha-i metrûkesi olup terekesine bi’l-verâse vaz‘-ı yedi mütehakkık olan mu‘arrefetü’z-zât Hamide bt. Ali nâm hatun kendi nefsinden asâleten ve müteveffâ-yı mezbûrun sulbiye sagīre kızı olup kendüden mütevellide derûn-ı arzuhâlde mezkûretü’l-ism Emine’nin tesviye-i umûruna kıbel-i şer‘den vasiyy-i mansûbesi olmağla vesâyeten muvâcehesinde babamız müteveffâ-yı mezbûr Ömer’in babası müteveffâ-yı merkūm Mehmed müteveffâ-yı mezbûr Camcı el-Hâc Mustafa ile li-ebeveyn er karındaşlar olup babaları ismi Kalaycı Salih ve dedeleri ismi Ali ve vâlideleri ismi Âişe bt. Ahmed ve maskat-ı re’sleri medîne-i mezkûre mahâllâtından Atîk Vâlide Sultan mahallesi olup ol vechile müteveffâ-yı mezbûrun verâseti zevcesi mezbûre Hamide Hatun ile sulbiye sagīre kızı merkūme Emine’ye ve usûbet-i nesebiye cihetinden bize münhasıra olup bizden gayrı vâris ve terekesine müstahıkk-ı âharı yoğiken zevce-i mezbûre Hamide Hatun müteveffâ-yı mezbûrun ber-mûceb-i defter-i kassâm terekesinin mecmû‘unu bi’l-verâse ve bi’l-vesâye kabz ve vaz‘-ı yed etmekle makbûzundan hisse-i irseyimizi bize teslîme zevce-i mezbûre Hamide Hatun’a tenbîh olunmak matlûbumuzdur deyü da‘vâ etdiklerinde ol dahi cevâbında tereke-i müteveffâ-yı mezbûreyi bi’l-verâse ve bi’l-vesâye kabz ve vaz‘-ı yedini ikrâr, mâ‘adâ müdde‘iyân-ı mezbûrânın ber-vech-i muharrer verâset müdde‘âlarını külliyen inkâr etmekle müdde‘iyân-ı merkūmân Mehmed İzzet ve Mehmed Nazif ber-minvâl-i meşrûh müdde‘âlarına mutâbık beyyine taleb olundukda udûl-i ahrâr-ı ricâl-i Müslimînden li-ecli’ş-şehâde meclis-i şer‘a hâzırân olan medîne-i mezkûre mahâllâtından Sinan Paşa mahallesi imâmı es-Seyyid Hafız Hüseyin Efendi b. es-Seyyid Ali ve Kefçe Dede mahallesi ahâlîsinden Kahveci Abdi Ağa b. el-Hâc Mehmed nâm kimesnelerden istişhâd olundukda fi’l-hakīka müdde‘iyân-ı mezbûrânın babaları müteveffâ-yı mezbûr Ömer’in babası müteveffâ-yı merkūm Mehmed müteveffâ-yı mezbûr Camcı el-Hâc Mustafa ile li-ebeveyn karındaşlar olup babaları ismi mezbûr Kalaycı Salih ve dedeleri ismi merkūm Ali ve vâlideleri ismi mezbûre Âişe bt. Ahmed ve maskat-ı re’sleri zikr olunan Atîk Vâlide Sultan mahallesi olup ol vechile müdde‘iyân-ı mezbûrân Mehmed İzzet ve Mehmed Nazif müteveffâ-yı mezbûr Camcı el-Hâc Mustafa’nın li-ebeveyn er karındaşı oğlunun oğulları ve usûbet-i nesebiye cihetinden vârisleridir biz bu husûsa bu vech üzere şâhidleriz şehâdet dahi ederiz deyü her biri müttefiku’l-lafz ve’l-ma‘nâ edâ-i şehâdet-i şer‘iyye etdiklerinde ba‘de’t-ta‘dîl ve’t-tezkiye şehâdetleri makbûle olmağın mûcebince müdde‘iyân-ı mezbûrân Mehmed İzzet ve Mehmed Nazif’in verâsetlerine hükm olunduğu tescîl ve huzûr-ı âlîlerine i‘lâm olundu.
Fî 15 Ca sene [1]256.
|