.:: İstanbul Kadı Sicilleri ::.


Anadolu Sadâreti Mahkemesi 2 Numaralı Sicil (H. 1251-1257/ M. 1835-1841)
cilt: 94, sayfa: 129
Hüküm no: 95
Orijinal metin no: [20a-2]
Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.


Fâtıma bt. Halil’in kızı Esma Hatun aleyhindeki menzil satışı iptali davasının reddedilmesi

Ma‘rûz

Mübârek Rikâb-ı kamer-tâb-ı hazret-i hilâfet-penâhîye arzuhâl takdîm eden mu‘arrefetü’z-zât Fâtıma bt. Halil nâm hatun bi’l-ma‘iyye rü’yete memûr Evkāf müfettişi mevâlî-i i‘zâmdan fazîletlü es-Seyyid Mehmed Emin Âsaf Beyefendi hâzır olduğu hâlde Salı günü huzûr-ı hazret-i fetvâ-penâhîde ma‘kūd meclis-i şer‘-i münîrde mezbûre Fâtıma Hatun’un sadriye kebîre kızı derûn-ı arzuhâlde mezkûretü’l-ism kezâlik mu‘arrefetü’z-zât Esma Hatun bt. Süleyman muvâcehesinde evkāf-ı celîle ve Haremeyn-i muhteremeyn nâzırı ricâl-i Devlet-i aliyye’den atûfetlü es-Seyyid Mehmed Şevki Efendi hazretleri taraflarından mürsel vekîlleri İbrahim Ağa b. Abdullah hâzır olduğu hâlde Hazîne-i celîle-i evkāfa mülhak evkāfdan ashâb-ı hayrâtdan sadr-ı esbak merhûm Halil Hamid Paşa Vakfı musakkafâtından medîne-i Üsküdar mahâllâtından Pazarbaşı mahallesinde kâin beher şehr altmış akçe icâre-i müecceleli ma‘lûmü’l-hudûd ve’l-müştemilât bir bâb menzilin dört sehm i‘tibârıyla bir sehmi benim ve iki sehmi dâmâdım gāib ani’l-meclis Hüseyin Ağa b. Halil nâm kimesnenin ve bir sehmi kızım mezbûre Esma Hatun’un bâ-temessük-i mütevellî bi’l-icâreteyn taht-ı tasarrufumuzda iken ben menzil-i mezkûrda mutasarrıf olduğum bir sehm hisse-i mezkûreyi sene-i sâbık Cemâziyelevveli’nin on dokuzuncu günü iki bin beş yüz guruş bedel-i medfû‘ ve makbûz mukābelesinde beni ölünceye değin görüp gözetmek şartıyla sûret-i kat‘iyyede kızım mezbûre Esma Hatun’a bâ-re’y-i mütevellî ferâğ ve tefvîz ve teslîm eylediğimde ol dahi ol şartla tefevvüz ve tesellüm ve kabûl edip, lâkin şart-ı mezkûr ile ferâğın adem-i sıhhatine binâen makbûzum olan bedel-i mezkûr iki bin beş yüz guruşu yedimden ahz birle bir sehm hisse-i mezbûreyi bâ-re’y-i mütevellî geri bana redd-i ferâğa kızım merkūme Esma Hatun’a tenbîh olunmak matlûbumdur deyü da‘vâ etdikde ol dahi cevâbında yedimde olup târîh-i mezkûr ile müverrah sâbıkā Üsküdar kādısı mevâlî-i i‘zâmdan fazîletlü Lütfullah Efendi ve müfettiş-i mûmâ-ileyh fazîletlü es-Seyyid Mehmed Emin Âsaf Beyefendi’nin hatemleriyle mahtûm işbu bir kıt‘a i‘lâm-ı şer‘î nâtık olduğu üzere kādı-i mûmâ-ileyh tarafından meb‘ûs kâtib Hafız Hasan Efendi ve müfettiş-i mûmâ-ileyh tarafından [20b] mürsel Kâtib Mehmed Esad Efendi’nin menzil-i mezkûrda huzûr-ı Müslimînde bi’l-ma‘iyye akdeyledikleri meclis-i şer‘-i münîrde vâlidem müdde‘iyye-i merkūme Fâtıma Hatun menzil-i mezkûrda ber-vech-i muharrer mutasarrıfe olduğu bir sehm hisse-i mezkûreyi bedel-i misli idüğü bi’l-ihbâr zâhir ve mütehakkık olan meblağ-ı mezkûr iki bin beş yüz guruş bedel-i medfû‘ ve makbûz müstehlek-ı mukābelesinde bâ-re’y-i mütevellî rızâsıyla kat‘iyyen bana ferâğ ve tefvîz ve teslîm eylediğinde ben dahi ber-minvâl-i muharrer tefevvüz ve tesellüm ve kabûl eylediğimden sonra vâlidem müdde‘iyye-i mezbûre Fâtıma Hatun bi’l-cümle ferâğ-ı mezkûre müte‘allika âmme-i da‘vâdan benim zimmetimi ibrâ-i âmm-ı râfi‘u’l-hisâm ile kabûlümü hâvî ibrâ ve iskāt etmiş idi deyü müdde‘iyye-i mezbûrenin inkârına mukārın eylediği def‘ini ve mazmûn-ı i‘lâm-ı mezkûru her biri mahallerinde lede’t-tezkiye adl ve makbûlü’ş-şehâde idükleri ihbâr olunan mahalle-i mezbûre muhtâr-ı sânîsi es-Seyyid Ahmed Ağa b. Ömer ve mahalle-i merkūme civârında Uncular mahallesi ahâlîsinden Abdülvehab b. İbrahim nâm kimesneler şehâdetleriyle bi’l-muvâcehe ber-nehc-i şer‘î isbât etmeğin mûcebince müdde‘iyye-i mezbûre Fâtıma Hatun da‘vâ-yı mezkûresiyle kızı mezbûre Esma Hatun’a bî-vech-i şer‘î mu‘ârazadan men‘ olunduğu huzûr-ı âlîlerine i‘lâm olundu.

Fî 7 Ca sene [1]256.